El Caisse d'Épargne historique
10 - Jules Verne pi ches sociétés
Pindant ches 34 énées qu’j’o resté Anmiens, j’o prins part à gramint d’société. Dré chl’énée 1872, j’o été erchu par chl’Académie d’Anmiens.
In 1895, j’o été lonmé administrateus d’el Caisse d’Epargne d’Anmiens dù qu’j’étoés warant d’ches dépots d’ergint. A ch’momint-lo, ech batimint i s’treuvoét à ch’19 d’el rue d’La République, qu’adon ch’étoét coér l’rue des Rabuissons. Edpu 1898 dusqu’à 1904, j’o été mimbe d’ech Consel d’ches Dirigeus pi ch’2 d’moai 1898 j’o perzinté ch’compte-rindu d’ches opéracions d’el Caisse pour ches 2 énées d’edvant. J’o laiché kér chl’ouvrage-lo à keuse qu’ej viusichoés pi qu’ej devnoés verligoute.
In 1889, j’o rintré din chele Société industrielle d’Amiens, qu’ale o été atampie in 1861 par des fabrikeus d’toèle pour incourager ches fabrikes d’ech poaiyi. Parmi chét-lo qu’is ont mis à voée chele société-lo, I avoét chl’inginieus Edouard Gand, in d’mes pus boins chochons à Anmiens. J’o kér à aler din l’riche bibiotèque d’chele achuchon-lo, à ch’liméro 29 d’el rue d’Noéyon.
Ej su étou mimbe d’chele Société d’horticulture. J’y o foait deus diries pour ches moaites assannées ed 1891 pi 1894.
Traduction Olivier ENGELAERE pour l'Agence régionale de la langue picarde
