15 – L’Cathédrale pi chl’Office de Tourisme
Ichi, l’cathédrale, qu’os délonme La Belle Dame d’Amiens, ale s’impose ! Ch’Jules Verne, il o foait conme tous ches gins, il o resté estomatché par el bieuté incroyabe « d’echl’eximpe ed l’art gothique à ch’13ème sièke » conme qu’i l’o récrit din Une ville idéale. I nin perle étou din « L’escret ed Wilhem Storitz » :
« l’cathédrale ]… ] ch’est in monumint d’ech 13ème sièke doù qu’ech roman pis ch’gothique is sont touillés insanne.Chpindant, chele cathédrale-lo ale o des bielles perties qu’is font l’atache ed ches connicheus qu’is erbeytte ed près : s’fachade qu’ale est incadrée per 2 tours, s’flèke qu’ale est posée dsu ch’transept pi qu’ale foét troés chint tchinze pieds d’heuteur, sin portal chintral qu’i est rimpli d’courbures, éne rosace d’éne bieuté incroyabe, surtoute quand qu’ech solé i mile eddin adon qu’i s’in vo s’joutcher pi, qu’à mzure, l’grande nef ale proufite d’el leumière, pi pour nin définir, sn’abside tout in rondeur qu’ale s’infike intèr ches gambes-ed-forche qu’in in finit pus dé zzes compter ».
El plache Notre Dame ale o bin cangé tout du long d’ches sièkes pi d’ches évènemints. A n’ersanne mie pu à chu qu’Jules il o connu à ch’19ème sièke aveuc des vielles moaisons pi point gramint d’place dvant ch’batimint. Après chele 2ème Guerre Mondiale, os ons étampi in fache d’el cathédrale des moaisons qu’is raminteuvtte ches formes pis chés décoracions ed ches batichages d’ech 13ème sièke.
Enhui, ch’est lo qu’in treuve ch’l’Office de Tourisme et des Congrès d’Amiens Métropole.
Traduction Françoise DESMARET pour l'Agence régionale de la langue picarde
