Jules Verne i s’inspire d’Anmiens
Mi, ej m’inspire d’Anmiens din mes romans, mais ch’est souvint à l’muche-tin-pot. Seuf in 1875, din Une ville idéale, dù qu’ej magine qu’j’o été rué din l’avenir in train d’visiter in Anmiens qu’il o cangé.
Din Le secret de Wilhem Storitz (récrit in 1898, dépulié in 1910), ej transbahute ène poaire ed coses d’Anmiens din ène vile émaginée ed l’Europe chintrale : des drèves aveuc des conters-voées, l’estacion, el catédrale pi l’chitadelle. Eme moaison d’el rue Charles Dubois ale est prins in exampe pour chele d’ech cérusien Roderich aveuc esn huche ed cour pi in gardin fin grand, ène démeure aveuc in colidor qu’il o des vitrals bitaclés pi ène rondé tour qu’ches émontés is leus déviroultte eddin.
Parelmint, ch’est possibe d’erconnoaite chl’Octroé din l’décrivure d’el moaison Wilhelm Storitz, qu’ch’est ll’héro d’ech roman : « j’o aperchu ène moaison toute seue au mitan d’in gardin […]ale étoét drole pi ale alloét à l’inconte dé zz’eutes hotels dech boulvard. […] I avoét éne huche din l’fachade […] qu’pour n’y monter i falloét prinde in pèron aveuc troès passets qu’is étoétte berzillés. »
Traduction Julie BOIVIN pour l'Agence régionale de la langue picarde
