Jules Verne in famile
« Edpu ches bieus jours 1871, ej vivoés aveuc mes gins à ch’liméro 24 d’ech boulvard Guyencourt, j’m’avoés décidié à n’y acater éne moaison. Ch’est in sectimbe 1873 qu’j’o vnu rester à ch’44 d’ech boulvard Longueville (qu’achteure cha s’lonme boulevard Jules-Verne). Ch’est lo qu’j’o récrit L’Île mystérieuse (1874-1875), Michel Strogoff (1876), Les Cinq cents millions de la Bégum (1879), La Maison à vapeur (1880), intr’eutes.
J’o erdébagagé coèr in keup in octobe 1882 pour evnir à ch’liméro 2 d’el rue Charles-Dubois, el moaison à ch’coin d’ech boulvard Longueville, qu’ch’est lo qu’i n’y o achteure el Moaison Jules Verne.
A l’parfin d’ech 19e sièke, j’o d’pus in pus ed mau à aler pi m’démeure ale est fin grande. In octobre 1900, j’ertourne din m’darène moaison. Ch’est lo qu’j’aplache eme tave ed blanc bos din ène plache à l’apoé d’eme cambe. Ej m’accionne coér gramint pi ch’est adon qu’j’aponte mes darains romans conme La Chasse au météore in 1901 pi Maître du monde in 1902. »
Jules Verne i est défincté ch’24 ed march 1905 din chele moaison-lo dù qu’il o vécu pindant 14 énées. Il o été intiéré ch’28 ed march din ch’chimintière d’El Madeleinne. Sn’intiérmint i a ratiré tant pus eq 5000 personnes pi s’famile ale o erchu des chints d’messages. El monde intier i étoét d’deul.
Traduction Olivier ENGELAERE pour l'Agence régionale de la langue picarde
