Ch’Jules i fréquinte ch’Musée d’Picardie
Ch’Musée d’Picardie ch’est éne nouvieuté pour ch’19eme sièke. Il o falu douze énées pour l’étampir, inter 1855 pis 1867. Ch’est ch’preume bâtimint qu’il o té foait in France pour dévnir in musée ed bieus arts pis d’archéologie.
Tout du long d’eme vie à Anmiens, ej m’o intéressé à ch’Musée. A cope qu’j’o vnu rester Anmiens, j’o saké ddin pour ech social pi chele tchulture din l’ville qu’a m’avoét adopté. J’n’o pos atindu d’ète éli échevin in 1888 pour prinde des fonccions qu’is sont loyées aveuc l’gouvernanche d’el conmeune. Ch’est conme o qu’j’o été lonmé à l’conmission amistrative d’ech Musée ed Picardie.
A ch’moés ed février d’l’énée 1888, j’étoés lo quand qu’ech Musée il o erchu l’grinde toéle Pro Patria Ludus (des jus pour el patrie) qu’ale avoét té pinte par Pierre Puvis de Chavannes pour chl’escayer d’honneur. Ej n’y o invité emn amisse Philippe Gille qu’i foaisoét des croniques ed litérature dins ch’Figaro pi qu’i avoét récrit des tchots lives d’opéra. Y o éne foto qu’a rind ch’momint-lo immortel. Ale amoute, cote-cote, Frédéric Petit, ch’mayeu républitchain sortant, pis mi, qu’j’o bin voulu eme porter aveuc li.
Quand qu’j’o été échevin, j’eme su toudis intéressé à ch’Musée pi à s’rédrie. Quand qu’j’o vu qu’i ny avoét des pintures qu’is injoloétte des burieus d’el moaison d’ville, j’o ieu l’pécavi d’inmner ches bieus tablieus-lo à ch’Musée pour qu’tertous is peuchtte nin proufiter.
Traduction Françoise DESMARET pour l'Agence régionale de la langue picarde
